Централното претседателство на Движењето за реформи на ДПА што го предводи струшкиот градоначалник Зијадин Села денеска во Тетово одржа состанок на кој донесе одлука дека во постојните услови партијата нема да учествува на изборите на 5 јуни.
– Движењето за реформи на ДПА е за избори со стандарди за кои тврдиме дека во моментов не се исполнети. Нашата партија ќе го чека мислењето на Државната изборна комисија околу изборачкиот список и доколку сметаме ќе имаме и друг став во наредните денови, изјави претседателот на Движењето за реформи на ДПА, Зијадин Села.
Тој апелираше до меѓународната заедница да помогне во надминување на кризата околу изборниот процес.
– Апелирам до европската заедница и САД да не дозволуваат уште еднаш да се манипулира со волјата за промени на граѓаните, истакна Села.
Од Движењето за реформи на ДПА сметаат дека изборите треба да се организираат со учество и консензус на сите политички партии за да се гарантира вистински легитимитет на изборниот процес и неговите резултати.