Со блокада на улицата пред Собранието во Скопје, Движењето „Ниту една повеќе“ вечерва изрази револт поради убиството на Росица, како и многу други случаи на фемициди кои според нив имаат несоодветен третман од институциите.
Учесниците во протестот посочија дека жените во оваа држава, како и во светот, не се заштитени.
– Наместо да се плашиме која ќе биде следна, тука сме да кажеме – ниту една повеќе, беше кажано на настанот.
На протестот повторно беа побарани измени во Кривичниот законик, како и насилството врз жените да се гони по службена должност, а беше и најавено дека вакви собири се планира да се одржуваат секој четврток.
Испратен беше повик сите заинтересирани да го кажат своето искуство на темата и да ја споделат својата приказна.