Единицата за економски и компјутерски криминал при СВР Скопје вчера ги лишила од слобода лицата А.Л. (43) и Х.Б. (42) од Скопје поради постоење основано сомнение за сторено кривично дело „фалсификување пари“.
Како што соопшти МВР, по преземени оперативни мерки и активности констатирано е дека приведените на крајот од минатата година, односно на 30 декември 2017 година во супермаркетот „Тинекс“ во промет пуштиле 20 фалсификувани банкноти во апоени од 500 денари.
При лишувањето од слобода и извршениот претрес, кај А.Л. се пронајдени шест банкноти во апоени од по 100 евра, шест банкноти во апоени од по 50 евра, три банкноти во апоени од по 500 денари, една банкнота од 1.000 денари, две банкноти во апоени од по 100 денари и една банкнота од 200 денари. Притоа било утврдено дека две банкноти од по 100 евра и две банкноти во апоени од по 500 денари се фалсификувани и подготвени за пуштање во промет од страна на А.Л. При претресот кај А.Л. пронајдена е фалсификувана лична карта.