Две нови кражби во цркви забележала тетовската полиција во изминатите денови, информира портпаролот на СВР Тетово Марјан Јосифовски.
Првата се случила ноќта помеѓу петокот и саботата при што засега непознати сторители насилно провалиле во црквата „Свети Атанасиј“ во селото Радиовце, пришто го искршиле стаклото од влезната врата. Потоа од длабока чинија и пластична кутија кои се наоѓале на масата во црквата одзеле околу 2.000 денари и оштетиле една икона кршејќи го скршиле стаклото од рамката. Вкупната штета се проценува на околу 4.000 денари.
Вториот настан се случил во засега неутврдено време и повторно засега непознати сторители насилно провалиле во црквата „Света Петка“ во Стенче и потоа од плик одзеле 20 евра и 3.000 денари прилози од верниците. Во овој случај материјалната штета се проценува на околу 9.000 денари.
Полицијата на двете места извршила увид и работи на откривање на идентитетот на сторителите и расчистување на овие кражби.
– Од почетокот на годината во тетовско на сличен начин е провалено во десеттина цркви и вообичаено крадците го прават тоа по празници бидејќи претпоставуваат дека тогаш во црквите има повеќе парични доброволни прилози од верниците, рече Јосифовски.