Во Министерството за надворешни работи денеска со свечена програма ќе биде одбележана 20-годишнината од воспоставување на дипломатските односи меѓу Република Македонија и Република Турција.
По тој повод ќе се одржат пленарни разговори меѓу делегации на двете земји, а министрите за надворешни работи на Република Македонија и Република Турција, Никола Попоски и Ахмет Давутоглу, ќе дадат изјави за медиумите.
Шефот на турската дипломатија Давутоглу почесен доктор на науки на УКИМ
По предлог на Правниот факултет „Јустинијан Први“ во Скопје, Универзитетот „Свети Кирил и Методиј“ синоќа на свечена седница на Универзитетскиот сенат му додели титула почесен доктор на науки (doctor honoris causa) во областа на меѓународните односи на проф. д-р Ахмет Давутоглу, министер за надворешни работи на Република Турција.
Професор д-р Борче Давитковски декан на Правниот факултет во Скопје ги изложи биографските податоци, научниот опус, професионалната дејност и општествен ангажман на Давутоглу.
– Овој чин на свечена промоција на проф. д-р Ахмет Давутоглу за почесен доктор на науки на нашиот Универзитет е израз на соработката на нашите пријателски земји, а посебно во областа на образованието. Овде ја нагласувам и соработката на нашиот факултет со правните факултети на универзитетите во Република Турција, рече Давитковски.
Давутоглу истакна дека му претставува задоволство и чест што ја добива оваа награда.
– Се чувствувам интелектуално и духовно дел од овој Универзитет. Ова е специјално за мене бидејќи Скопје е мојот град од соништата, од детството до сега. Скопје е интелектуаелен и културен центар не само на Балканот, туку на Европа и на нашата заедничка култура, рече Давутоглу.
Во своето обраќање тој се задржа на важноста и мисијата на образованието, на универзитетите, на значењето на титулата професор, на односот со студентите. Потсети на историјата на регионот, на Балканот и повика на толеранција, почитување на идентитетот, културата и религија.
– Македонија е мојот втор дом. Ја поддржуваме Македонија во спорот со името секаде во светот. Не само што сме и пријатели, туку се чувствуваме и како да сме од Македонија. Имаме толку многу врски и блиски пријателста. Ова ви го кажувам од длабината на моето срце, рече Давутоглу.
На доделувањето на титулата присуствуваа претседателот Ѓорге Иванов, вицепремиерката Теута Арифи, министрите Панче Кралев и Хади Незир, ректорот на УКИМ Велимир Стојковски, декани, професори од УКИМ и студенти.
Шефот на турската дипломатија вечер ќе има средба со претседателот на Република Македонија Ѓорге Иванов.
Тој ќе престојува и утре во Скопје и ќе има средби со премиерот Никола Груевски, со претседателот на Собранието Трајко Вељаноски и со министерот за надворешни работи Никола Попоски.
Ахмет Давутоглу е доктор по политички науки и меѓународни односи и поранешен универзитетски професор.