Со 15.451 амандман коалициската ДУИ ќе го „напаѓа“ , Законот за бранителите, поднесен од пратеничката група на ВМРО-ДПМНЕ.
Партијата на Ахмети ги исполни ветувањата дека со сите средства ќе се бори да не се донесе законот, кој според нив е штетен и антиалбански, или пак во него да бидат загарантирани исти права и за бранителите и за припадниците на ОНА.
По молчењето и маратонското говорење ова е нова тактика за да се пресретне тактиката на ВМРО-ДПМНЕ, законот да се донесе во скратена постапка со ограничување на дискусиите.
Поднесените амандмани треба да се разгледуваат на Комисијата за труд и социјална политика, чија седница е закажана за четврток. Дотогаш ДУИ може да поднесе нови амандмани.
Со законот за бранителите се регулираат правата на припадниците на безбедносните сили на Република Македонија и на членовите на нивните семејства, а за такви се сметаат припадници на МВР, Министерството за одбрана и резервниот состав.
ДУИ со слична тактика и со илјадници амандмани во 2008 година, поради блокада на законодавниот дом, предизвика предвремени избори.