Демократската партија на Албанците ја почна кампањата за претстојните предвремени парламентарни избори во скопско Студеничани.
Претставувајќи ја програмата на партијата лидерот Мендух Тачи, го повика членството и симпатизерите овие избори да бидат мирни и демократски, бидејќи, како што рече, само тоа е во интерес на Албанците.
– Се разбира дека сме во состојба на извонредно и многу големо незадоволство кон нашите опоненти, Али Ахмети и ДУИ. Сепак ние ќе бидеме победници и ќе ја донесеме слободата и економското зајакнување на Албанците. Од денеска треба да се погрижиме состојбата да не излезе од контрола. Има многу непријатели кои се заинтересирани политичката состојба на Албанците од Македонија да ја извадат од контрола. Ние нема да дозволиме тоа да се случи, рече Мендух Тачи.
Под мотото „Чекориме право“, во Студеничани беа испратени пораки дека ДПА ќе води кампања за позитивни промени.