По којзнае којпат на прес-конференција на ВМРО-ДПМНЕ беа изнесени неточни информации, односно невистини преку кои неуспешно се прави обид да се наруши угледот на Владата, на премиерот Зоран Заев и вицепремиерот Кочо Анѓушев, велат од владината прес-служба како реакција на обвинувањата на портпаролот на опозициската партија, Димче Арсовски, кој денеска кажа дека Заев му доделил државно земјиште на Кочо Анѓушев.
Од прес-службата на Владата велат дека ВМРО-ДПМНЕ изгледа изгубено, безидејно и надвор од сите етички и правни норми.
„Би сакале на јавноста да ѝ ја презентираме вистинската слика. Претседателот на Владата, Зоран Заев, не му дал согласност на Анѓушев да гради нова мала хидроцентрала, договорот за концесија врз основа на кој е добиен долготрајниот закуп за државното земјиште е потпишан во 2015 година, врз основа на тендерска постапка, кога на власт беше ВМРО-ДПМНЕ и кога Кочо Анѓушев не бил функционер“, се наведува во соопштението.
Од Владата им порачуваат на претставниците на ВМРО-ДПМНЕ пред да држат прес-конференции претходно да ги прочитаат законите и подзаконските акти врзани за темата.
„Уште еднаш ќе ги упатиме да се консултираат и со претседателот на партијата, Христијан Мицковски, кој преку уделот во концесионерот ‘Минка-енерготек’ добил долготраен закуп од претходната Влада за неколку од изградените хидроцентрали и добро е запознаен со административните процедури во целата постапка на давање на концесија, изградба и ставање во функција на една мала хидроцентрала“, стои во владиното соопштение.
„За јавноста повторно ќе напоменеме да не потпаѓа под лажните обвинувања и скандали, дека станува збор за строго дефинирани права и обврски од договорите за концесија, донесувањето одлука за долготраен закуп на државно земјиште е право со кое се стекнува секој концесионер, во случајот МХЕ ‘Тополки’ ДОО Скопје, кој има потпишано договор за концесија за вода за производство на електрична енергија од мали хидроцентрали. Нема ништо незаконско во донесената одлука, а уште помалку, пак, некаков судир на интереси внатре во Владата на Република Македонија“, потенцираат од владината прес-служба.
„Судир на интереси е кога поранешниот претседател на Владата, Никола Груевски, ќе даде согласност на својот советник за енергетика, сегашен претседател на ВМРО–ДПМНЕ, Христијан Мицковски, да изгради мали хидроцентрали преку компаниите во кои тој има удел. Ова меѓудругото не беше објавено транспарентно туку беше откриено неколку години подоцна“, додаваат од Владата.