Министерот за одбрана на Република Македонија Талат Џафери и заменик-началникот на Генералштабот на АРМ генерал-мајор Насер Сејдини денеска се сретнаа со делегацијата на турските вооружени сили, предводена од бригадниот генерал Неџдет Туна.
На средбата, како што соопшти Министерството за одбрана, Сејдини посочил дека соработката меѓу двете земји е на високо ниво. Тој истакнал дека за АРМ од големо значење е поддршката, обуките и едукацијата во турските образовни центри.
Генералот Туна истакнал дека Република Турција ќе продолжи да ја поддржува Македонија за достигнување на стратегиската цел – членство во НАТО алијансата. Тој го поздравил и придонесот на Република Македонија во меѓународните мировни мисии.
Турската делегација е во посета на Македонија по повод одбележувањето на 114 години од дипломирањето на Мустафа Кемал Ататурк на Воената гимназија во Битола, 13 март.