Талат Џафери и денеска се обиде седницата на Комисијата за труд и социјална политика, да се одвива по вчерашното сценарио. Тој да молчи, да си чита некоја книга, а другите да го слушаат неговиот молк.
Џафери читаше и поезија од Ацо Шопов.
Инспириран од напишаното:
„Тишина, ако носиш нешто неизречено, ако нешто те притиска и пече, тишината сама ќе го рече“, одлучил повторно ставот со молчење да го искаже.
Пратениците од опозицијата , реагираа дека вака не може да се продолжи, дека ова е непродуктивно, и се трошат и време и пари од граѓаните.
Атмосферата се вжешти, Џафери се налути зошто опозициските пратеници му пречат во молчењето.
„Ова не е само фарса, туку и срам. Ова може до недоглед да оди. Вака ВМРО-ДПМНЕ сака да молчи и божем го предлага законот, а ДУИ божем се буни“, реагираше Шеќеринска.
Џафери рече дека зборот бил негов и дека е подготвен и на скандали.
Подносителите на Законот за бранители, пратениците од ВМРО-ДПМНЕ, не реагираат, и тие молчат.
Претседателот на Комисијата, Цветанка Иванова, поради бесмисленоста на ваквиот тек на седницата, ја прекина седницата, и најави дека од претседателот на Собранието ќе бараат објаснување, дали ова и деловнички е дозволено. Иванова рече дека има многу реакции од граѓаните, и дека бесмислено се трошат пари на граѓаните.
Опозицијата реагира, дека ВМРО-ДПМНЕ и ДУИ имаат договор, со вакво премолчување да ја заташкаат коалициската криза, и да не заглават во лавиринтот со поднесувањето на законот за бранители.