„Препознавање и признавање на сексуалните и родовите различности“ е темата на панел дискусијата што ќе се одржи денеска во Скопје со цел да понуди преглед на досегашните практики, актуелната состојба и клучните и неопходни чекори за подобрување на состојбата со правата на сексуалните и родовите малцински групи во Република Македонија.
Говорници на дискусијата ќе бидат Евгенија Гиакумопулу од Советот на Европа, Ричард Келер од Transgender-Europe, Наташа Бошкова од Коалицијата СЗПМЗ, и Кочо Андоновски од ЛГБТИ Центарот за поддршка при Хелсиншкиот комитет.
Целта на дискусијата е да понуди преглед на досегашните практики, актуелната состојба и клучните и неопходни чекори за подобрување на состојбата со правата на сексуалните и родовите малцински групи во Република Македонија. Посебен фокус во рамки на дискусијата ќе биде ставен врз состојбата со правата на трансродовите лица во Македонија, областите во кои е регистрирано највидливо прекршување на нивните права, судската пракса во Македонија за правно признавање на родот, и потребата од законска регулација на правното признавање на родот. Прашањата и приоритетите за локалниот контекст ќе бидат ставени во поширока рамка и во контекст на постојните практики во други земји на Европа, заложбите на Советот на Европа по овие прашања, и праксата и препораките на Европскиот суд за човекови права.
За целите на дискусијата ќе биде обезбеден симултан превод.
По дискусијата, учесниците на панелот и гостите во публиката ќе имаат можност да ја видат поставената изложба на победничките фотографии на PRIDE PHOTO AWARD за 2016 година, која беше отворена на 05.12.2017, а организирана во партнерство помеѓу Амбасадата на Кралството Холандија во Македонија и Коалицијата СЗПМЗ.