Градоначалникот на општина Центар, Андреј Жерновски, денеска ги повика директорите на 7-те основни општински училишта за да разговараат околу случувањата со провокативните и политички натписи кои се појавија на некои училишта.
На училиштето „Гоце Делчев“, кое е на територија на Центар, беше залепен плакат на кој пишува „Парична казна од 5.000 евра за секој што не знае албански јазик“.
На средбата беше присутен и командирот на Полициската станица „Центар“, кој им повтори на директорите дека поставување на вакви написи во училиштата, како и агитирање внатре во училиштата, претставува кривично дело. Кривично дело е и отстранувањето на плакатот, бидејќи со тоа се уништуваат и дел од доказите против сторителите.
Директорката на ООУ „Гоце Делчев“ јасно посочи дека вакво политичко агитирање е труење на децата и дека треба да биде најстрого санкционирано, се вели во соопштението на општина Центар.
„Јас точно знам зошто е избрано училиште во општина Центар и зошто токму училиштето „Гоце Делчев”, каде што учат моите две деца, но сакам уште еднаш да повторам дека инволвирање на децата и учениците за политички цели и интереси, во било кое училиште, нема да дозволам“, рече Жерновски.
Полицијата презема мерки за откривање на оние кои го поставија плакатот, а во и околу училиштата ќе има зголемено ниво на будност.