Воздухопловната власт во земјава најавува директни летови од Скопје до некои од поголемите градови во Канада, Бразил, Сингапур најверојатно кон крајот на годинава. Иако допрва треба да се потпишуваат некои од спогодбите за отворено небо со овие земји, неколку нискобуџетни авиокомпании од Европа, Америка, Азија, но и од Истокот го скенираат македонското небо, пишува „Фактор“.
Од Агенцијата за цивилно воздухопловство засега не сакаат да откриваат детали, но потврдуваат дека во преговори се за потпишување билатерална спогодба за отворање на небото меѓу Македонија и Бразил, Кувајт, Сингапур, како и Финска, Естонија и Полска.
– Бразил допрва ќе стане атрактивна туристичка дестинација за Македонците. Ако се земе предвид и дека Бразил во 2014 година ќе биде домаќин на Светското фудбалско првенство, а во 2016 година таму ќе се одржуваат Олимписките игри, за нас ќе биде голем предизвик да воспоставиме авионска линија до Бразил. Се уште не можам да прецизирам дали тоа ќе биде директна линија или можеби ќе ја искористиме конекцијата од Скопје до Дубаи – вели за Фактор, директорот на Агенцијата за цивилно воздухопловство, Дејан Мојсовски.
Од АЦВП уверуваат дека авиосообраќајот во земјава полека се раздвижува, што укажува на тоа дека цените на авионските билети треба да го напуштат плафонското ниво, споредено со цените на билетите во Европа и во светот.
Мојсовски додава дека изминатава година за Агенцијата била успешна што покажува и потврдата од Евростата дека во првата половина од 2012 година за 19% пораснал бројот на Македонци што патувале со авион, во споредба со 2011 година.