Носителот на кандидатската листа во Третата изборна единица од ВМРО-ДПМНЕ и Коалицијата „За подобра Македонија“ Илија Димовски, денеска од Делчево најави отворање рудник за јаглен и изградба на термоцентрала.
– Во следните четири години Владата предводена од ВМРО-ДПМНЕ и државните компании од областа на енергетиката ќе вложат огромни милиониски суми во енергетскиот сектор, во откривање нови рудни богатства и во зголемување на капацитетот на производство на електрична енергија. Еден од клучните проекти во програмата „Реално“ се наоѓа во Пијанечко-малешевскиот дел, односно во селата Стамер и Панчарево, каде изминатиот период се направија сериозни истражувања чии првични резултати говорат дека количините на јаглен овде се огромни, но она што е за изненадување е квалитетот кој е одличен, ако не и најдобар во Македонија, рече Димовски.
Посочи дека вниманието во овој регион ќе биде насочено кон тој потенцијал.
– Завршување со сите физибилити студии и отворање голем рудник за јаглен и создавање услови за изградба на термоцентрала што ќе значи многу вработувања за овој дел од Македонија, но и индустриски препород на целиот регион. Државните компании се со сериозна намера да работат на овој проект, а ние како пратеници во следниот параламент ќе даваме сериозна поддршка и напор до Владата и државните компании овој проект да оди по динамиката која е предвидена, изјави Димовски.
Тој денеска имаше средба со граѓани од Делчево, каде беше презентирана програмата, посебно во делот на образованието, младите и поддршката на компаниите.