ВМРО-ДПМНЕ ниту досега, ниту во иднина има намера да се меша во работата на Јавното обвинителството и судовите во Република Македонија, како што воопшто не се мешаше кога овие институции притвораа и затвораа членови и функционери на ВМРО-ДПМНЕ осомничени за прекршување на законите.
Ова на денешната прес-конференција го соопшти Илија Димовски, член на ИК на ВМРО-ДПМНЕ и директор на Центарот за комуникации на ВМРО-ДПМНЕ.
Никој, потенцира Димовски, не може да има различен третман од секој друг граѓани само заради тоа што е член или функционер на една или друга партија.
– По карактерот на барањето на СДСМ до ВМРО-ДПМНЕ, да се вмеша во овие работи и да издејствува ослободување од притвор на Шиповиќ, јасно е дека со СДСМ се уште владее Црвенковски и неговата школа. Не толку одамна, Црвенковски јавно објаснуваше како премиерот треба да крене слушалка и да заврши ваква работа. Ние разбираме дека така се работело во време на СДСМ, но ВМРО-ДПМНЕ не работи на тој начин, ниту пак некогаш ќе работи, истакна Димовски.
Тој информира дека согласно законот не постои можност ВМРО-ДПМНЕ да ја преземе власта во општина Центар бидејќи, како што рече, ако Шиповиќ се повлече или поднесе оставка на негово место доаѓа повторно човек од листата на СДСМ.