Секој глас за Аце Коцевски на овие избори е и глас за Бранко Црвенковски и Љубчо Георгиевски. Тие се луѓето кои нанесоа најголема штета во минатите дваесетина години во нашиот град. Во нивните мандати се затворија сите поголеми фабрики и фирми во нашиот град, а Велес остана град со 10.000 помалку работни места, изјави денеска на прес-конференција во Велес пратеникот Илија Димовски.
Оваа изјава тој ја даде како реакција на обвинувањата на кандидатот за градоначалник на Велес од СДСМ Аце Коцевски.
– Вклучени сме во поддршката на кандидатот за градоначалник на Велес Славчо Чадиев, и јас и другиот пратеник Коџабашиев, и министрите од Владата и целиот Општински комитет на ВМРО-ДПМНЕ и целата советничка листа. Ние сме тим. За разлика од нас, Коцевски е сам. Нема ниту еден човек со посериозна кариера и искуство зад себе, изјави денеска Димовски.
Целиот град, додаде тој, знае дека и тој самиот демонстративно ја напуштил седницата односно состанокот на СДСМ, кога СДСМ ја кроел советничката листа, бидејќи како што самиот кажал „СДСМ со таква советничка листа и такви кадри на советничката листа не може да победи во Велес“.
-Тоа е разликата, Коцевски е сам и единствено со поддршката од Љубчо Георгиевски и Бранко Црвенковски, рече Димовски.
По митингот на СДСМ во Велес, додаде тој, и нему почнува да му станува јасно дека граѓаните повеќе не му веруваат. –
Господине Коцевски, за време на вашиот мандат за пратеник, и во време на вашиот мандат за градоначалник, никој од нас не слушна брза, остра и јасна реакција за кој било грабеж и за која било приватизација или стечајна постапка во Велес, но кога некој лично ќе ве прозве, реагирате во рок од 24 часа, изјави Димовски.