Собранието треба да реши дали ќе ја следи волјата на народот, изјави министерот за надворешни работи Никола Димитров на денешната дебата „Билатералното на Балканот: Регионалните импликации на билатералните спорови“, организирано во рамки на Форумот за граѓанско општество Скопје 2018.
– Излезеноста на референдумот беше приближно 37 проценти и иако имаме Изборен законик што предвидува цензус, сепак, 609 илјади граѓани или над 91 проценти кажаа „да“. Тоа е мнозинството и тие сакаат Македонија да оди напред – да се усвои договорот со Грција, да се приклучиме кон НАТО и почнеме пристапни преговори со ЕУ. Следат разговори во Парламентот. Ни претстои историска одлука. Нашата реалност е дека не може да го заобиколиме спорот за името на патот кон НАТО и ЕУ. Парламентот треба да реши дали ќе ја следи волјата на народот. Ова е клучот. Ако сакаме напред, треба да го искористиме овој клуч, рече Димитров.
Според него, единствен пат кога повеќе граѓани се изјасниле „за“ на некои избори биле оние во 1994 година кога Киро Глигоров беше избран за претседател на државата.
Димитров, меѓудругото, истакна дека брзи предвремени парламентарни избори се последна опција.
Клучниот поттик за земјите од регионот се евроинтеграциите, рече шефот на македонската дипломатија. Потребно е земјите од регионот да покажат дека се способни да ги решаваат сопствените проблеми и да станат нејзини сојузници во справувањето со глобалните проблеми како миграцијата.
– Треба да се надминеме себе си во однос на перформансите со цел да го зграбиме нивното внимание бидејќи не знам уште колку можности се останати. Некои од нив пропуштивме, станува се потешко. Порано беше автопат, а сега патот на евроинтеграциите е стеснет. Немаме повеќе време, треба да се фокусираме на вистинските прашања, рече Димитров.
Во последните децении земјите во регионот повеќе биле фокусирани на дебати и неразумни прашања како која е најстара нација, кој страдал повеќе, кој има поголеми непријатели или поголеми победи и порази во минатото, наместо да се посветет на прашања за соработката или за образованието, дигиталната економија…
– Ако одлучиме да останеме во рововите на историјата ќе го изгубиме моментумот, а светот не чека на нас, порача Димитров, кој меѓудругото се осврна и на придобивките од Договорот со Бугарија.
Косовскиот новинар и публицист Ветон Сурои на дебатата истакна дека Македонија и Грција сами го решија спорот за името со постигнување на Договорот од Преспа. Ако Македонија го имплементира тој договор тоа ќе биде многу позитивно не само за самата земја, туку и за целиот регион.
– Тоа ќе покаже дека компромисите за тешки спорови како што се идентитетските прашања се можни и дека во фрагментирани општества можно е да се постигне критична енергија за движење на опшеството напред. Ако Македонија и Грција дојдат до спроведување на договорот тие ќе пренесат порака не само до Западен Балкан, туку и до ЕУ дека постојат делови во Европа кои силно веруваат во ЕУ, од делови од самата ЕУ, вели Сурои.