Министерот за надворешни работи на Република Македонија, Никола Димитров изјави дека разговорите за прашањето за името со Грција ќе продолжат во периодот по празниците.
– По подолга пауза од три години имавме прва средба на преговарачите со медијаторот Нимиц. Договорена е следната да биде по празниците во јануари така што не би требало да се очекува некакво посебно случување во периодот на празниците. Поставена е сцената, процесот е отпочнат, динамиката е воспоставена, меѓутоа нема ништо поново да се случи додека траат празниците, рече Димиторв на новинарско прашање на заедничката прес-конференција со неговиот унгарски колега Петер Сијарто кој се наоѓа во посета на Македонија.
Тој беше прашан за изјавата на бугарската потпретседателка Илијана Јотова дали е во духот на добрососедството тоа дека 70 илјади Македонци кои добиле бугарски пасоши се Бугари. Димиторв одоговори дека го нема видено нејзиниот коментар, а како одговор ја посочи потребата од брза интеграција во ЕУ.
– Вистинското решение како да се справиме со тоа што наши државјани аплицираат за пасоши на други земји, на земји членки е да ја зголемиме атрактивноста на македонскиот пасош. Вистински долгорочно решение како да се соочиме со овој предизвик е пасошот на РМ да стане пасош на земја членка на ЕУ. И затоа е многу важно да направиме се што можеме да ја искористиме шансата што се црта полека за 2018 година, рече министерот Димитров.