Цел месец Емил Димитриев, Никола Тодоров, Никола Попоски, Елизабета Канческа Милевска го кршат Уставот, Законот за Влада и Изборниот законик.
Во член 8 од Изборниот законик јасно е пропишано: Функцијата пратеник е неспојлива со функцијата претседател на Републиката, претседател на Владата на Република Македонија, министер, судија, јавен обвинител, јавен правобранител, народен правобранител и со други носители на функции кои ги избира или именува Собранието на Република Македонија и Владата на Република Македонија.
Законот е јасен, но бидејќи кај нас некој е над Законите и Уставот, веќе месец дена, Димитриев си е и избран пратеник со верификуван мандат, но и си ја обавува функцијата премиер, иако уште при договарањето во Пржино беше зацртано тој да е премиер за спроведување на изборите.
Изборите поминаа, но Димитриев не го напушта кабинетот.
И Тодоров, Канческа Милевска и Попоски дадоа заклетва за пратеници, но кршејќи ги Законите се уште ја обавуваат министерската функција.
Па тројцата потпишуваат, делат пари и се промовираат со нови опреми.
Оливер Спасовски и Фросина Ременски ги напуштија кабинетите, Санта Аргирова МТВ, Зоран Заев градоначалничката функција, Зијади Села не е повеќе градоначалник на Струга, но Емил Димитриев се уште ја чува премиерската фотелја.
Експертите реагираат дека ова правно е неиздржано, но никој не ги слуша.
Па така, може да се доведеме во небулозна ситуација, доколку за овие седум дена Груевски и Ахмети договорат владин кабинет, сами за себе во функција пратеник Емил Димитриев, Никола Тодоров, Никола Попоски, Елизабета Канческа Милевска да си гласаат како за министри.
Нејасно е од кој орган и за која функција за овој месец тие ќе добијат плата? Од Собранието, од Владата или од пооделните министерства? Или можеби и од двете места, бидејќи луѓето биле „вредни“ и извршувале двојни функции?