Излезеноста до 13 часот според податоците добиени од општинските изборни комисии (ОИК) на територија на РМ изнесува 27,11 проценти. На ниво на Град Скопје е 29,17 проценти, соопшти на денешната втора прес-конференција портпаролот на ДИК Љупка Гугучевска.
На ниво на Републиката највисока излезност од 47,53 проценти е забележана во Демир Капија, а најниска во Желино 17,71 процент.
Во скопските општини излезноста е следна: во Аеродром 33,97 проценти, во Бутел 28,44 проценти, во Гази Баба 29,34 проценти, во Ѓорче Петров 32,98 проценти, Карпош 34,64, во Кисела Вода 32,45 проценти, Сарај 20,31 процент, Центар 33,52 проценти, Чаир 21,88 проценти и во Шуто Оризари 19,16 проценти.
Во Скопје, според бројот на излезени гласачи, излезноста е највисока во Карпош 34,64, а најмала во Шуто Оризари 19,16 проценти.
На прашањето дали се регистрирани неправилности во текот на изборниот процес, Гугучевска изјави дека ДИК во моментов е во постојано заседание, односно има седница на која сите предизвици кои се појавуваат во текот на гласањето се решаваат.
– Сите неправилности се отстранети и гласањето тече без прекин, рече Гугучевска.
Од ДИК не ги коментираа забелешките на МОСТ во однос на неправилности во текот на гласањето и најавија прес-конференција во 18 часот на која ќе дадат пресек за излезеноста до 17 часот и за случувањата на избирачките места.