Девет странски државјанки на возраст од 21 до 37 години се приведени во акциската контрола на полицијата што ноќеска од 23 часот до 3 часот по полноќ била спроведена во угостителските објекти „Баци“ во тетовското село Синичане и „Енерџи клуб“ покрај локалниот пат за Сараќино.
Во угостителскиот објект „Баци“ затекнати се осум странски државјанки од кои три од Албанија, две од Косово и исто толку од Србија и една албанска државјанка со привремен престој во Тетово. Во „Енерџи клуб“ затекната е една девојка од Црна Гора.
– Деветте странски државјанки кои во објектите нелегално биле ангажирани како пејачки и танчерки и го злоупотребиле својот престој, приведени се во Полициската станица Тетово, задржани се и денеска ќе бидат предадени на Отсекот за прекуграничен криминал, странци и реадмисија за натамошна постапка, во рамки на која ќе се утврдуваат сите поединости околу нивниот престој и работење на подрачјето, изјави портпаролот на СВР Тетово, Марјан Јосифовски.