„Вчерашниот театар на ВМРО-ДПМНЕ со непочнувањето на дебата по Извештајот на СЈО, денеска се претвори во циркус.
Очигледно е дека стравот на ВМРО-ДПМНЕ од работата на СЈО ги принудува да се однесуваат хаотично и дополнително да се заплеткуваат во небулозни ситуации кои значат само дополнително фрлање буџетски пари, пари на граѓаните. Неделовничкото однесување на г. Ѓорчев го чини пари ова Собрание, меѓу другото и за патни трошоци на пратениците кои и вчера и денес дојдоа за седница на комисијата која не ни започна“, рече Дескоска.
„На сите ни јасно дека заради стравот од одговорност за криминалот, ВМРО-ДПМНЕ бега од дебата по Извештајот на г-ѓата Катица Јанева, но и по Извештајот на г. Марко Зврлевски.
Во текот на преговорите за Закон за СЈО, СДСМ бараше СЈО да поднесува извештај на пократок рок, другата преговарачка страна бараше рокот да биде 6 месеци. Тогашната претпоставка беше дека на 15 март Собранието ќе биде распуштено и ВМРО-ДПМНЕ се надеваше дека извештајот на СЈО нема да се најде пред пратениците.
Се надеваа дека Собранието нема да има можност да дебатира за:
– сите опструкции од страна на претставниците на ВМРО-ДПМНЕ во власта со кои се соочува со СЈО
– за несоработката со институциите кои се под контрола на ВМРО-ДПМНЕ со СЈО
– за најавата за први обвиненија во најскор временски период
– за започнатите предистражни постапки против високи функционери на ВМРО-ДПМНЕ за прислушување, изборни нерегуларности, злоупотреба на постапки по јавни набавки, незаконитости во финансирање на медиуми, даночно затајување, перење пари, незаконитости во постапки кои се однесуваат на градежни работи и друго.
Денеска уште еднаш го повикуваме ВМРО ДПМНЕ да не ја оневозможува дебатата по Извештајот на г-ѓата Катица Јанева доставен до Собранието пред една недела, а воедно и да се стави на дневниот ред Извештајот на г. Марко Зврлевски доставен до ова Собрание пред 9 месеци.
Воедно, го повикуваме г. Ѓорчев да си го препорочита членот 121 од Деловникот и да постапува во согласност со истиот“, изјави Рената Десковска, пратеничка и членка на комисијата за политички систем.