Министерката за правда, Рената Дескоска вели дека таа добила информација дека сестра на врховен судија има коронавирус. Одговарајќи на новинарско прашање, рече дека таа очекува сите судии, институции, заедно со судовите да ги почитуваат препораките за самоизолација доколку биле во контакт со лице заболено од вирусот.
„Тие информации ги добив и јас. Сите мерки кои ги дава Министерството за здравство, а потоа Владата ги утврдува, важат за сите институции. Препораките за самоизолација, препораките за изолација луѓе кои биле во допир со лицето кое било заболено, важат и за Врховниот суд и сите други судови. Затоа беше и апелот од Владата и во рамките на судовите целосно да се почитуваат сите препораки, како што се почитуваат во сите институции. Тие имаат обврска да постапуваат“, кажа Дескоска.
За гужвите пред Кривичниот суд, каде се чека во редици а луѓето се групираат, спротивно на препораките од Владата, Дескоска вели дека треба да се почитува одлуката на Судскиот совет, а претседателите на судовите јавно да ги објават распоредите за судењата кои продолжуваат.
„Дадовме препорака како Влада. Редот таму го созздава Судскиот совет. Ние препорачаваме она што не е нужно да не се спроведува, за да се намали гужвата низ судовите. Сметаме дека одлуката донесена од Судскиот совет и препораките од Владата ќе бидат почитувани. Тие правила на влез во институции, мора да се почитуваат. Се надевам дека претседателите на судовите транспарентно ќе ги објават распоредите за да се види кои судења продолжуваат“, кажа министерката.