По повод Денот на бригадата за логистичка поддршка (брЛП) денеска во Командата лоцирана во продолжение на воено-медицинскиот центар и ГОБ „8 Септември“ во Скопје ќе се одржи свеченост.
Според програмата, по историскиот осврт за Денот на единицата, предвидено е доделување стимулативни мерки, а ќе биде прогласена и најдобрата екипа за одржаните спортски активности кои претходеа на одбележувањето на денот.
На свеченоста ќе присуствуваат претставници од Министерството за одбрана и Генералштабот на АРМ, команданти на команди и единици на ГШ на АРМ, поранешни команданти на единицата и други гости.
Со одлука на претседателот на Република Македонија за определување на денови на единиците на АРМ, за Ден на брЛП е одреден 20 мај, во спомен на денот кога во 1876 година започнало Разловечкото востание.
Команда за логистичка поддршка е највисока единица од доменот на логистиката во АРМ, чија основна мисија е планирање, организирање, координирање и извршување на логистичка поддршка на командите и единиците на АРМ.