Општина Битола ја демантира веста со наслов „Општина Битола плати 80.000 евра за ископан асфалт од Плетвар: Измама е, асфалтот никаде го нема“. Демантот го објавуваме во целост:
„Општина Битола, во целост ги демантира дезинформациите објавени во веста со горенаведениот наслов. Од страна на општината не е направена никаква измама, а тоа можете да го проверите и со увид во документацијата со која располага општината, а од која јасно се гледа дека: општината за транспорт, распостилање и вградување на 2792 м3 гребен асфалт, врз основа на комплетна документација за извршени работи, исплатила 4.941.840 денари.
Нагласуваме: економскиот оператор Стентон градба ДОО е исплатен врз основа на извршен транспорт, распостилање и вградување на гребениот асфалт на 11 локации (што значи дека не е платен гребениот асфалт, туку извршените работи, како и што стои во договорот).
Во интерес на професионалното новинарство и информирање на граѓаните, Ве покануваме да извршите увид на документацијата со која располага општината и за тоа објективно да ја информирате јавноста.
Во насока на нетенденциозно, навремено и точно информирање, очекуваме, нашиот демант целосно да биде пренесен“, стои во демантот од општина Битола.