Заменик-министерот во Министерството за економија Христијан Делев денеска во Битола се сретна со стопанствениците од таа општина и градоначалникот Владимир Талески.
На средбата со новинарите во Битола, Делев истакна дека средбата со бизнис секторот во овој град е во функција на развојот на малите и средните претпријатија од Пелагонискиот регион.
– Со претставниците на бизнис заедницата разговаравме за новите програми, за можностите на економските зони како и програмите на Владата за развој на мали и средни претпријатија. За нас особено се корисни информациите за проблемите со кои се соочуваат бизнисмените од овој крај и како можеме да им помогнеме, посочи Делев.
Според градоначалникот Талески ваквите директни средби со бизнис секторот се во функција на нови вработувања, размена на информации и создавање услови за нови инвестиции.
– Решението е збир на информации. Ние како локална самоуправа ги вклучивме сите капацитети и ресурси за создавање услови за изградба на фабрики и отворање на нови работни места. Потврда за тоа е индустриската зона „Жабени“ за големи капацитети, каков што е и гигантот „Кромберг и Шуберт“, како и Бизнис старт-ап центарот со кој помогнавме на над 200 мали и средни претпријатија или фирми самостојно да функционираат, истакна Талески.