Затворени се поголемиот дел од кафулињата и рестораните во Скопје, согласно препораките на Владата и заострените мерки за превенција од коронавирусот кои денеска ги усвои Комисијата за заразни болести.
Сепак, можеа да се забележат и дел кафулиња и ресторани кои работеа и после 18 часот, а дел пак, на социјалните мрежи напишаа дека од утре ќе почнат да ги спроведуваат препораките.
На дел од граѓаните кои седеа во кафулињата и рестораните пред затворањето, им беше чудно кога вработените им соопштуваа дека треба да станат, бидејќи локалот затвора.
Околу 18.15 часот, поголемиот дел од кафулињата и рестораните во Дебар Маало, Аеродром и Кисела Вода веќе беа празни, а внатре седеа само вработените.
Забележливо е и дека низ скопските улици е намалена фреквенцијата на сообраќајот, но затоа аптеките работат со полна пареа. Најчесто се бараат гелови за дезинфекција на раце. Вработените во дел од маркетите, пак, на себе носат и заштитни ракавици бидејќи имаат постојан допир со пари.