Декоративен водопад со автентичен изглед во кој истекува т.н. мрзлива река е изграден во мајор коритото на Крива Паланка од вработените во секторот Паркови и зеленило на Јавното претпријатие „Комуналец” .
– Камениот водопад го надополнува ликот на градскиот кеј, се формира мрзливата река која истекува од градската фонтана од паркот. Во водопадот има мини површини со засадено цвеќе, а на околниот простор ќе се доуреди цветна површина, информира раководителот на Секторот Драги Пејчиновски.
Периодов, рече, се засадени околу 15.000 цвеќиња на јавните градски површини во општината.
– Во градскиот парк, на кејот покрај ролерско-велосипедската патека, во цветните форми на влезот и излезот на градот, во мини парковите и пред јавните институции беа засадени нови летни цвеќиња, вкупно околу 15.000. Беа засадени и цвеќиња во саксиите на канделабрите долж главната улица „Св. Јоаким Осоговски“ и долж обиколницата на магистралата А2, додаде Пејчиновски.
Хортикултурно е уреден и делот од граничниот премин Деве Баир од македонска страна, како и канделабрите, а направени се и повеќе цветни форми.