Собранието ќе ја продолжи расправата по Извештајот од Европската комисија за напредокот на Македонија.
На вчерашната сесија се водеше дебата меѓу пратениците од опозицијата и власта. Фокусот беше решавање на спорот со името и добивање датум за преговори со ЕУ, како и на делови од Извештајот.
Опозицијата ги отфрла тезите дека ова е најпозитивниот досега.
„Го поддржуваме напредокот, колку и да е тој формален“, изјави Гордан Георгиев од СДСМ, и додаде дека тактиката на Европската комисија е сменета. Одговарајќи му на Влатко Ѓорчев рече дека треба да се остават настрана паушалните оцени и да се обрне внимание на фактите.
Според Ѓорчев, Македонија доби по четврти пат позитивен Извештај, а поради противењето на Грција се уште нема преговори.
Пратеничката Радмила Шеќеринска оцени дека Македонија тоне во бесперспективности. Според неа, Извештајот јасно ги покажал коруптивните слабости, недостатокот на плурализам и слобода на медиумите.
На дневен ред на денешната седница е и Интерпелацијата за работење на претседателот на Регулаторната комисија за енергетика на Македонија, потоа Предлогот за именување на член на Советот на ЈП Македонска радио телевизија, Предлогот на финансискиот план на Регулаторната комисија за енергетика на република Македонија и измени и дополнувања на неколку закони.