Кандидатот за градоначалник на општина Гостивар од Левица, Дарко Грујоски, и носителот на листата за советници од оваа партија, Никола Исакоски, на прес-конференција ги претставија изборните програми.
Грујоски кажа дека програмата која ја нуди е вистинската алтернатива за Гостивар, одговара на реалните потреби на граѓаните и нуди конкретни решенија.
-Нашиот фокус е на луѓето – на најмалите, на младите, на семејствата и на постарите лица. Предвидуваме изградба на нови детски градинки, изградба на старечки дом во кој постарите сограѓани да добијат соодветна и човечка грижа и системско решение за бездомните кучиња, преку прифатилишта и хумано згрижување. Ова не се празни ветувања. Ова е јасен план, со конкретни решенија и приоритети кои произлегуваат директно од потребите на граѓаните. Време е Гостивар да добие локална власт што навистина работи за луѓето – чесно, транспарентно и со визија. Време е за промена. Време е за Гостивар каков што заслужуваме, рече кандидатот за градоначалник Дарко Грујоски.
Освен грижа за спорот со реновирање на спортските сали, тој најави и решавање на недостигот од канализација во населба Млаки и во Бањешница.
Носителот на листата за советници од партијата Левица, Никола Исакоски, се осврна на програмата за работа во општинскиот совет и залагање за подобрување во сферите на урбанизмот, економскиот развој, транспарентноста во трошењето на буџетски пари, воведување на ред во локалната самоуправа.
– Со нашето влегување во советот ќе се залагаме за поддршка на мали занаетчии и семејни бизниси. Во сферата на урбанизмот, ревизија на сите ДУП-ови. Освен средување на сообраќајниот хаос, ќе се залагаме и за нови зелени зони, патеки за велосипедисти и пешаци, рече Исакоски.
Тој се осврна и на воведување на комуналниот ред во општината и најави зачестено одржување и чистење на јавните површини, селекција на отпад и видеонадзор на местата каде што се создаваат диви депонии.
На прес-конференцијата присуствуваше и лидерот на партијата, Димитар Апасиев, кој потоа оствари повеќе средби со сопартијците и граѓани од Гостивар.