Кандидатот за градоначалник од ВМРО-ДПМНЕ за Општина Лозово Орце Цветковски најавува оти ќе го подобри стандардот на живеење во општината за да се создадат можности за вработување на младите.
– На Лозово му се потребни работни места. Нашата младина останува да живее во општината, наша желба е да ги задржиме во општината, да создадеме подобар услови за живот, таа да биде посакувано место за живеење и да ја спречиме миграцијата село-град, рече денеска на прес-конференција Цветковски.
Тој информира дека е изработен Урбнистички план за индустриската зона во Лозово, поради што ќе продолжеле активностите за привлекување инвеститори. Ќе се работело и на создавање услови за отворање откупен пункт за земјоделски производи, производствен погон од текстилната индустрија, како и изградба на ново монтажно училиште во Каратманово, повеќенаменско игралиште во Милино, училишна спортска сала во Лозово.
Меѓу другото, посочи, се планира и давање под закуп на земјоделско земјиште од АК „Џумалија“ на инвеститори за подобрување на бизнис климата,со што би се вработиле голем дел од населението.