„Да, точно е, прв ја прескокнав оградата. Прв го пробив полицискиот кордон, бидејќи имаше многу шпекулации во македонската јавност, зошто тоа се случи. Во тој момент не известија дека нашите пратеници во Собранието се претепуваат и се исфрлаат надвор од собраниската сала“, вели претседателот на СДСМ Бранко Црвенковски за случувањата пред собранието во понеделникот.
Што друго можевме да направиме, прашува тој, освен да се обидеме да им помогнеме. Тоа беше целта, да влеземе во Собранието, да им помогнеме на нашите колеги пратеници, кои што го бранеа уставниот поредок и демократијата во Република Македонија. Да, беше применета сила, не се жалам, бидејќи ми е јасно со кого си имаме работа, на што се се спремни, ние тоа ќе го издржиме. Оваа битка мора да се добие. Оваа битка е многу повеќе отколку битка помеѓу две партии, помеѓу власта и опозицијата, ова е битка за иднината на земјата.