Претседателот на СДСМ Бранко Црвенковски денеска во одговор на писмото на еврокомесарот за проширување Штефан Филе, посочува дека наполно е свесен за делот на одговорноста што ја носи опозицијата во процесот на надминување на разликите и оти се подготвени за дијалог кој би довел до политички договор меѓу власта и опозицијата.
– Длабоко ја почитувам Вашата загриженост за политичката криза во нашата земја предизвикана со настаните од 24 ти декември и последиците што таа ги предизвикува за европските перспективи на Република Македонија.
Наполно сум свесен за делот од одговорноста што го носи опозицијата во процесот на надминувањето на разликите и изнаоѓањето на решение кое ќе ги смири тензиите и ќе ги нормализира состојбите.
Како и во изминатиот период ние во деновите што доаѓаат сме подготвени за политички дијалог кој би довел до политички договор меѓу власта и опозицијата.
За жал, таква политичка волја барем во претходниот период не беше демонстрирана од страна на премиерот Груевски, кој сите иницијативи и предлози ги одби, а за што се надевам Вие сте целосно информирани.
Се надевам дека соочен со големата одговорност за иднината на земјата г-динот Груевски и неговата партија ВМРО-ДПМНЕ ќе демонстрираат вистинска желба за разрешување, а не за продлабочување на политичката криза.
СДСМ и здружената опозиција остануваат целосно посветени на одбрана на демократијата, почитување на правото и европската интеграција на Република Македонија, вели Црвенковски во писмото упатено до Филе.