„Враќање во парлементот нема, единствен излез од оваа криза се предвремени парламентарни, фер избори“, порача вечерва лидерот на СДСМ, Бранко Црвенковски.
„Овие денови се случуваат настани кои ќе ја одредуваат судбината на Македонија, влогот е голем и од битката нема повлекување“, рече Црвенковски.
На Зоран Заев, рече тој, власта не треба да му се обраќа зашто од него можат само да учат и вода да му носат. Со народни пари, рече Црвенковски го лажат сопствениот народ.
„Седум години овој народ молчеше и трпеше, со притисоци и лаги живеееше, гледаше како народните пари ги трошат за хирови и лечење на фрустрациите. Донесоа буџет на криминален начин, тепаа луѓе пратенци кои се глас на народот. Хероите од власта тепаа жени и избркаа новинари, а сега не викаат да се вратиме назад. За што? За да го продолжат тепањето?“, праша Црвенковски и ги повика струмичани да бидат во првите редови не само за Струмица, туку за да победи Македонија.