Потпретседателот на Владата и министер за надворешни работи и европска интеграција на Црна Гора, Игор Лукшиќ денеска ќе престојува во еднодневна официјална посета на Република Македонија на покана од министерот за надворешни работи Никола Попоски.
Како што соопшти МНР, за време на посетата, освен со својот домаќин министерот Попоски, црногорскиот министер ќе биде примен и од претседателот Ѓорге Иванов, а ќе оствари средба и со премиерот Никола Груевски.
На средбите предвидено е да се дискутира околу билатералната соработка, со акцент на економијата и странските инвестиции. Соработката во рамки на европските и евроатланските процеси како и регионалната соработка исто така ќе бидат во фокусот на разговорите.