Центарот за развој на медиуми (ЦРМ), покрај тоа што им обезбедува правна помош на новинарите, континуирано ги мониторира и сите судските постапки за навреда и клевета кои се однесуваат на новинари, уредници и медиуми.
„Во првиот квартал од 2015 година, ЦРМ следеше 33 судски предмети на 68 рочишта. Од донесувањето на Законот за граѓанска одговорност за навреда и клевета, во ноември 2012 година, до сега, завршени се 51 случаи за навреда и клевета против новинари, но поголемиот дел од пресудите сè уште не се правосилни односно во тек е жалбена постапка пред Апелациониот суд.
Мониторингот на ЦРМ, покажува дека пред Основниот суд во Скопје, во првите три месеци од оваа година, поведени се 26 нови предмети за навреда и клевета, од кои дури половината, се однесуваат на новинари и на медиуми. Оваа бројка од 13 нови судски предмети за само три месеци, го потврдува трендот на континуирано поднесување тужби за навреда и клевета против новинарите односно го потврдува фактот дека новинарството е професија која најчесто се среќава низ судските постапки. Исто така, овој тренд, но и досегашната пракса, покажуваат дека судовите и судските постапки за навреда и клевета се еден од најчесто користените механизми за притисок врз новинарите и нивната работа.
Центарот за развој на медиуми констатира и тренд на поднесување тужби на новинари против новинари. Драган Павловиќ Латас, во текот на 2014 година, на пример, поднесе низа тужби против новинари и медиуми, и тоа за пренесување информации од прес-конференција на политичка партија, поврзани со аферата Висарис. Во првиот квартал од 2015 година, Основниот суд Скопје 2 Скопје, го одби тужбеното барање на Драган Павловиќ Латас против Бранко Героски, како неосновано. Ваквата одлука на судот претставува добар пример за тоа како судовите треба да ги штитат слободата на информирање и слободата на изразување.
Во првиот квартал од 2015 година, правосилно се завршени само 3 предмети. Апелациониот суд ги потврди одлуките на Основниот суд и според Центарот за развој на медиуми, се придржуваше до Законот за граѓанска одговорност за навреда и клевета, Европската конвенција и праксата на Судот во Стразбур. На ваков начин судовите воспоставуваат добра пракса која треба да ја применуваат во сите судски постапки односно и во постапките во кои се инволвирани политичари и функционери од власта. Досегашниот мониторинг на ЦРМ, покажува дека судиите правилно постапуваат единствено во судските случаи во кои нема политичари од власта, а целосно потфрлаат и користат двојни аршини во случаите кога се инволвирани функционери и претставници на владејачките партии.
Центарот за развој на медиуми, во рамките на програмата на УСАИД за зајакнување на независните медиуми во Република Македонија и Проектот за одговорни медиуми и законодавни реформи во медиумската сфера, постојано ги набљудува судските постапки, поведени според Законот за граѓанска одговорност за навреда и клевета, пред Основниот суд Скопје 2 Скопје“, се вели во соопштението на ЦРМ.