Премиерот Никола Груевски денеска упати честитка до претседателот на Исламската верска заедница Сулејман Реџепи и до сите верници од исламската вероисповед во државата, по повод исламскиот празник Бајрам, посакувајќи им убави празнични денови, многу радост, среќа, здравје и спокој.
– Ова се денови од неизмерно големо значење за Вашата заедница и духовна посветеност. Честитајќи Ви го празникот, Ви посакувам и сите други месеци од годината да ви бидат исполнети со вредностите и благодетите на најблагородниот и најсреќниот месец за Вас, месецот Рамазан. Вербата во Бога да нè води кон вистинскиот пат и постојано меѓу луѓето да владее слога и почитување без разлика на религиската, верската, или каква било друга определба, се вели во честитката.
Премиерот истакнува дека религиите и верските учења треба да се искористат за продолжување на столетната традиција на пријателство, единство и хармонија.
– Да ги искористиме религиите и верските учења за убави нешта, за продолжување на столетната традиција на пријателство, единство и хармонија, како основа за забрзан економски, културен и сеопшт развој на Република Македонија. Тоа е единствениот пат кој води кон подобар животот на нашите граѓани, во секој дел на државата, во секое поле и од секаков аспект. Ние силно работиме на оваа агенда и уверен сум дека заеднички ќе продолжиме да чекориме по истиот пат, вели во честитката премиерот Груевски.