Премиерот Никола Груевскин упати честитка до поглаварот на Исламската заедница во Република Македонија Реис Ул Улема, Хаџи Сулејман Ефенди Реџепи и до верниците од муслиманска вероисповест по повод големиот верски празник Курбан Бајрам
.
– Хуманизмот и милосрдието меѓу луѓето кои се вековна традиција на овој простор и кои се карактеристика на овој празник, нека продолжат и оваа година. Споделувањето и простувањето помеѓу верниците, нивните роднини, пријатели и сограѓани, без разлика на вера, националност или друга определба, нека и оваа година биде симбол на почитувањето, толеранцијата и разбирањето меѓу луѓето. Тоа се вредности кои од секогаш го краселе нашето општество, вредности кои ги втемелиле нашите предци, вредности кои неуморно сме ги граделе низ годините и кои сигурен сум и во иднина ќе ги негуваме и празнуваме во нашата земја, се вели во честитката.
Верувајќи, како што е наведено, во вредностите кои не поврзуваат и со верба во силна, развиена и напредна Република Македонија, ги повика и понатаму да продолжиме заеднички да работиме на реформите и на модернизацијата на нашата земја, на подобрувањето на стандардот на граѓаните, унапредување на нашето граѓанско општество, развој на можностите во културата, образованието и останатите општествени сфери, на промоција на добрите вредности и добрата мисла во Македонија, како најдобра гаранција за понатамошни успеси за заеднички просперитет.
– Со искрени чувства за уважување на големиот празник, би сакал да Ви посакам убави празнични денови, многу здравје, хуманост, среќа и бериќет, стои во честитката од премиерот Груевски.