Министерот за одбрана на Република Македонија, Зоран Јолевски, на сите граѓани на Република Македонија им го честита Денот на независноста – 8. Септември.
– Сакам да Ви го честитам денот кога пред 25 години ја земавме судбината во наши раце. На денешен ден ги поставивме темелите на нашата иднина. На 8 септември 1991 година започнавме со остварувањето на сонот на нашите предци. Ја создадовме независна и суверена Република Македонија. И покрај сите предизвици со кои се соочувавме, сите ние посветено и со исклучителна одговорност работевме за нас, нашите сограѓани. Со иста желба, мотивираност и одлучност продолжуваме да работиме за иднината на нашите деца и потомци. Припадниците на АРМ заедно со граѓаните и институциите постигнаа многу во предизвиците со кои се соочи Република Македонија. Во скопскиот регион борејќи се со последиците од огромните поплави, Армијата покажа дека безбедноста на граѓаните на нашата татковина е наша светост.
Одлучноста за одржување на безбедноста на Македонија се виде и преку ангажманот на припадниците на АРМ на јужната граница. Секаде и секогаш, ние имавме огромна помош и поддршка од сите граѓани на Македонија. Големо е срцето и пожртвуваноста на нашите граѓани и тоа е најзначајно. Сето тоа покажува дека безбедноста и иднината на нашата држава е во сигурни раце. Нека ни е честит и вековит овој голем празник, Денот на независноста на Република Македонија!, се наведува во честитката на министерот Зоран Јолевски.