Премиерот Никола Груевски денеска упати честитка до претседателот на Еврејската заедница во Република Македонија Бјанка Суботиќ и до членовите на заедницата по повод големиот празник ПЕСАХ, посакувајќи им време исполнето со мир, молитва и душевен спокој.
– Горчината на ропството е горчина која ја имаат вкусено многу народи во историјата. За жал, ниту македонскиот, ниту еврејскиот народ не останале поштедени од оваа тешка и мачна општествена појава. Сепак, слободата била и останала една од најголемите вредности на луѓето, за чиј идеал никогаш не се жалеле животи и жртви. Токму затоа, да се потсетиме и да го прославиме тој идеал преку големиот празник ПЕСАХ, вели во честитката Груевски.
Ваквите празници, како што додава премиерот, се богатство на еврејската заедница, но и универзални добра со чие негување заеднички придонесуваме за подобра иднина, почитување, толеранција и хармонија помеѓу луѓето.
– Вашата заедница има дадено особен придонес за зачувувањето, промоцијата и ширењето на истите. Очекувам на тој пат заеднички да продолжиме, во насока на унапредување на ваквите вредности и развој на целокупните општествени односи во Република Македонија, подвлекува премиерот Груевски.