Претседателот на Собранието Талат Џафери упати честитка по повод 28-ми Ноември, Денот на албанското знаме и Денот на независноста на Република Албанија, земја која, како што е наведено во честитката, е непосреден сосед и потврден пријател на Република Македонија.
-Овој значаен празник е длабоко втиснат во колективната национална историска меморија и во срцата на сите припадници на албанскиот народ, а Албанците како значаен и интегрален дел на Република Македонија се обединувачко ткиво и вреден контрибутор во напредокот и развојот на државата и регионот. Денес, кога се одбележува 106-годишнината од кога истакнатиот дипломат Исмаил Ќемали, заедно со делегати од различни албански градови го истакна националното знаме во Валона, Албанците, каде и да се наоѓаат, го празнуваат овој симбол на албанската национална културна ренесанса, се наведува во честитката од Џафери.