Наставата на далечина во Прилеп и во земјава се одвива успешно и со солиден квалитет. Над 90 насто од учениците се вклучени во онлајн-наставата, а другите што не можат, следат преку телевизија, рече министерката за образование и наука Мила Царовска која денеска беше во Прилеп за да се увери во текот на комбинираната настава и да присуствува на донирањето 100 таблети за прилелпските и битолските ученици од социјално ранливи семејства.
– Констатиравме дека онлајн-наставата солидно квалитетно се одвива, а онаму каде се одвива со физичко присуство, од прво до трето, па и до петто одделение, се одвива со сите протоколи за заштита и нема драстичен број на позитивни случаи на коронавирусот. Така е на целата територија на државава. Има над 90 отсто успешно одвивање и следење на онлајн-наставата. Поточно процентот стигна до 90,2. Ова укажува дека само за еден месец воспоставување онлајн-настава во нашава држава, имаме повеќе од 90 проценти ученици кои следат соодветно и наставници кои соодветно одржуваат настава. За останатите девет проценти се следи настава преку телевизија, благодарност до МТВ што овозможи 15-минутни часови на телевизија, како и со достава на материјали. До 20 ноевмри ќе биде оценувањето на знаењата од првото тримесечие и сите предизвици ќе бидат пресретнувани. Одлично се справуваме со ситуацијата и уверена сум дека ќе имаме успешна учебна година, изјави Царовска.
Мнистерството за образование и наука со општините и училиштата отвори дискусија и секој треба да реши на ниво на општина и на ниво на колектив дали онлајн-наставата наставниците ќе ја одржуваат од училиштата или од дома. одлуката се очекува до 15 ноемвври.
– Ова е вака зашто секој наставник не може од дома да одржува настава. За тоа треба да се изјаснат општините и училишните колективи до 15 ноември кога ќе биде одлуката, рече Царовска.
Денеска се донирани 100 таблети од „Витаминка“ и продукцијата на „Преспав“ – „Охо“, по 50 за прилепските и за битолските ученици.
-Овие таблети се за да им помогнат на учениците од ранливите категории семејства да бидат активни во наставата, рече Симона Симоноска од ПИ „Витаминка“.
-Солидарноста и општествената одговорност се пресудни во вакви тешки моменти. Ги повикувам и другите општествени институции да се вклучат, рече Игор Ангелов од продукцијата „Охо“ и од проектот „Преспав“.
Прилепскиот градоначалник Илија Јованоски објасни дека таблетите се за учениците од ромска националност од прилепското основно училиште „Добре Јованоски“. Инаку општината веќе оддели околу 8 милиони денари за набавка на лаптопи за наставниците, а во тек е постапка со 17 милиони денари за таблети за ученици од ранливите категории семејства.
-Од блок-дотациите во општината се издвоени околу 17 милиони денари за таблети за учениците кои не може да си го дозволат тоа. Постапката е во тек. Не се знае бројот на таблетите, во прашање е колку чинат таблетите. Веќе се издвоени околу 8 милиони денари за лаптопи за наставниците, рече Јованоски.
Во моментов во Прилеп 10 наставници се во изолација, од кои пет се во ОУ „Кирил и Методиј“ во селото Канатларци, а другите се од основните училишта од градот. Има само две деца позитивни на корона-вирусот а 20-ина се во изолација.