Над 500-тини пензионери од 40 здруженија на пензионери на Македонија во 11 спортски дисциплини денеска во Кочани учествуваат на 22-рите Републички пензионерски спортски натпревари.
Организатор е Сојузот на здруженијата на пензионерите на Македонија, а генерален покровител Министерството за труд и социјална политика.
– Возрасните луѓе и пензионерите ја носат мудроста во себе. Ние од вас учиме. Како Влада ќе го почитуваме сето она што е поставено како барање од вас пензионерската организација. Ќе настојуваме како Влада и Министерство да го унапредиме квалитетот на пензионерското живеење во повеќе сегменти од живеењето. Ќе продолжиме со мерката бањско-климатско лекување до крајот на оваа, а планираме да ја реализираме и во наредната 2018 година. Ќе ги покачиме пензиите со усогласување на трошоците на живеење двапати во годината и на крајот на годината, истакна министерката за труд и социјална политика Мила Царовска.
Потпретседателот на СЗПМ Салтир Каровски пред присутните зборуваше за активностите кои се темел на организирање на оваа граѓанска асоцијација, а за денешните спортски натпревари истакна дека се најмасовни досега во своето 22-годишно постоење.
– Првите пензионерски спортски игри се одржаа 1996 година во Охрид и на нив учествуваа 10 пензионерски здруженија со 150 спортисти, за да денес да учествуваат 40 здруженија со над 500-тини спортисти, истакна Каровски.