Независниот кандидат за градоначалник на Општина Ресен Димитар Бузлевски ја почна предизборната кампања со средба во населбите Подмочани и Грнчари.
– Не случајно тргнувам од овие населби. Грнчари и Подмочани се пример за етнички соживот. Овде нема проблеми меѓу Македонците и Албанците, верувам така ќе биде и во иднина, рече Бузлевски.
Претставувајќи ја својата програма, тој вети вложувања во земјоделството зашто ресенскиот регион, рече, е препознатлив пред се по производството на јаболка.
– Знам дека на поголем дел од вас, егзистенција ви се јаболката. Оттука, моето ангажирање како градоначалник ќе биде, да се оформи општинска водна организација која ќе придонесе за поквалитетен род, изнаоѓање партнери за откуп на јаболковиот род. Со цел намалување на производствената цена, ќе настојувам електричната енергија во овоштарниците да се наплаќа како за домаќинствата, а целосно ќе се заложам и за изградба на складишни простори за чување и дистрибуција на јаболкото, истакна Бузлевски.
Кандидатот за градоначалник вети и изградба на малски спорски терени, отворање на граничниот премин Маркова Нога.