„Иако ми е тешко, сакам да се обратам во име на моето семејство – денес се случи убиство“.
Вака на Фејсбук ја започнува својата исповед Александар Стојаноски, брат и вујко на починатите мајка и ќерка кои денеска починаа по пад од шести кат од зграда во скопски Карпош.
„Денес потфрли МВР, Социјалните служби, денес потфрли целиот наш систем… После години на пријавувано семејно насилство, физичко и психичко насилство врз двете, закани, пријавувања, обид за убиство во сред државна институција, ги загубив внуката и сестрата. Државата овозможи да згаснат млади животи, ве молам да не шпекулирате што се случило, никој нема да ми ги врати најмилите, но правдата ќе мора да се истера до крај и нема да запреме додека не се случи тоа!“ пишува Стојаноски.
Тој вели „Со оглед на тоа што и покрај сите пријави и случувања, институциите не постапија до сега, барам фокус од јавноста и медиумите за ова, нема да дозволиме да помине само како бројка, правдата мора да го стигне секој еден!“.
„Сестра ми денес требала повторно да иде во социјално, за сите овие работи, а со внуката се слушнавме за Прочка, ми рече – вујче прости ми ако сум ти згрешила нешто … вујчино, прости ми ти, прости на овие неспособни институции, а јас вујче, нема никогаш да простам и да заборавам. Споделете, да не се заборави и изгуби низ нашиот систем!“ стои во објавата на ФБ.