Во недела, на Божик, ќе биде емитувано интервјуто на македонскиот премиер Зоран Заев за грчката ТВ Алфа во кое што тој зборува за името и решение во првите шест месеци од годинава, за Ципрас, Каменос и Мицотакис, за политиките на Груевски и намерите на Македонија.
– Во првото интервју дадено за грчки медиум, ја повторува намерата да придонесе во преговорите со заемни отстапки во прашањето за името на ПЈРМ. Обраќајќи се и кон грчкиот народ и кон народот на неговата земја, Заев вели дека е во интерес и на двете земји да се најде решение за прашањето за името во првата половина на 2018 година, објавува ТВ Алфа во најавата.
– Зоран Заев ги отфрла практиките на неговиот претходник Никола Груевски и објаснува зошто не се согласува со позицијата на претходните премиери, дека „Скопјаните се единствени наследници на Александар Велики“, наведува телевизијата во најавата за интервјуто, објавена на нејзиниот сајт и додава дека од разговорот, се откриваат намерите на Скопје и до кој степен е подготвено да направи отстапки.
Интервјуто ќе биде емитувано во недела во 20 часот по грчко време, веднаш по централното издание на вестите на телевизијата.
