Босна и Херцеговина вечерва отвори почесен конзулат во Битола, а за прв почесен конзул е избрана познатата македонска пејачка Билјана Дамјановска Јанчевска, родена во Мостар, а живее и работи како нотар во Битола.
Почесниот конзулат го отворија замениците министри во министерствата за надворешни работи на двете држави, Драгана Кипријановска од Република Македонија и Ана Тришиќ Бабиќ од Босна и Херцеговина.
– Отворањето на почесниот конзулат во Битола претставува еминентна потврда за добрите, традиционално пријателски односи меѓу Република Македонија и Босна и Херцеговина. Меѓу нашите две држави постои простор и огромен потенцијал за јакнење на соработката не само во политички контекст, туку и на економски и културен план. Верувам дека наскоро и двете држави ќе бидеме полноправни членки на големото европско семејство, посочи Кипријановска.
Според заменик министерката за надворешни работи во Владата на Босна и Херцеговина Ана Тришиќ Бабиќ, отворањето на почесниот конзулат во Битола е придонес на традицијата и вековните врски меѓу народите од двете држави.
– Од денеска има уште еднаш можност за продлабочување на врските меѓу граѓаните од двете држави, воспоставување на партнерства и соработка меѓу градовите, културна и друга соработка. Односите меѓу двете држави се исклучително добри и на високо ниво, и тоа е една од причините што имаме конзулат во Битола, истакна Тришиќ Бабиќ.
Во општина Битола во моментов има 12 почесни конзулати, а се очекува отворање и на нови, најави градоначалникот Владимир Талески на вечерашната свеченост на Широк Сокак во Битола.
– Преку овој конзулат ќе се обидеме да ги возобновиме врските со градовите во Босна и Херцеговина, но и да создадеме нови. Оваа голема придобивка е од интерес на сите битолчани, рече Талески.
Првиот почесен конзул на Босна и Херецеговина во Република Македонија со седиште во Битола, Билјана Дамјановска Јанчевска вечерва ја промовираше иницијатива за отворање на Клуб на конзули преку кој ќе се остваруваат чести и директни контакти на почесните конзули во овој град.
– Мислам дека соработката меѓу почесните конзули во Битола може да биде подобра и поголема. Верувам дека нашите идеи ќе вродат со плод и дека соработката ќе биде на многу полиња. Ова ново катче ќе биде во функција за сите, нагласи Дамјановска Јанчевска.
На свеченото отворање на почесниот конзулат во Битола присуствуваше и амбасадорот на Босна и Херцеговина во Република Македонија Здравко Беговиќ, како и претставници на јавниот живот од градот и државата.