Алатката за отчетност на трошоците на функционерите ќе продолжи со ажурирање, велат од Владата, откако вчера објавивме дека оваа алатка работеше само три месеци, а веќе осум месеци нема објавени нови податоци за тоа колку потрошиле премиерот и министрите за хотелски сместувања, авионски карти, мобилни телефони, ресторански услуги, дневници за патувања.
Од Владата велат дека на седницата минатиот месец се задолжиле премиерот, министрите, замениците на министрите, министрите без ресор, државните секретари и генералниот секретар до 31 јануари да ги подготват финансиските и наративните извештаи за новиот шестмесечен период (01.06.2018 – 30.11.2018).
„Податоците за третото шестмесечје ќе бидат јавно објавени и достапни за граѓаните до крајот на месец февруари. Процедурата за објавување на трошоците се спроведува после истекот на на секои следни шест месеци и подразбира прибирање информации, подготовка на табели во форма која е разбирлива за јавноста и нивна објава“, вели Миле Бошњаковски, портпарол на Владата, додавајќи дека „алатката ќе продолжи да ги прикажува трошоците на носителите на јавни функции, како придонес кон транспарентноста и отвореноста на Владата“.
Мери Јордановска