Обвинетиот Бојан Јовановски познат како Боки 13 денеска повторно ќе биде спроведен во Обвинителството за организиран криминал и корупција.
Тој доаѓа кај Русковска за да продолжи со давањето исказ за работата на Меѓународниот сојуз, откако во петокот повеќе од 8 часа се задржа кај неа. Истрагата за овој случај е завршена, а останатите осомничени веќе беа известени за тоа.
Обвинителството во овој случај ги гони заменик-претседателката на Меѓународниот Сојуз – Јасна Мандиќ, таткото на Бојан Јовановски – Миле Јовановски, асистентката на Јовановски – Кристина Блажевска, почесната претседателка – Фросина Ременски, како и самиот Бојан Јовановски. Изминатата недела сите, освен Бојан Јовановски завршија со давањето искази.
Душко Јанковиќ кој е бранител на Јасна Мандиќ-Ерцеговиќ по нејзиниот распит рече дека таа била донесена во заблуда од страна на Бојан Јовановски како претседател на Меѓународниот сојуз.
Ременски пак, смета дека по исказот даден пред Русковска, таа нема да биде повеќе осомничена во случајот. Обвинителката Вилма Русковска најави обвинение за овој случај на почетокот од идната година.