Министерот за образование и наука Арбер Адеми, францускиот амбасадор Кристијан Тимоние и градоначалникот Стефан Богоев денеска ги посетија спортската сала „Наум Наумовски – Борче“, позната како „Партизан“ и Основното општинско училиште „Братство“ во Општината Карпош.
Министерот Адеми истакна дека целта е да се покаже поддршката за изучување на францускиот јазик во македонските училишта, што претставува привилегија како еден од најдобро позиционираните јазици на светската мапа на јазици.
– Поддршката за изучување на францускиот јазик е најмалото нешто што Македонија може да го направи за една пријателска земја како што е Франција, која е голем поддржувач на нашите напори за зачленување во Европската Унија, но и за покревање на квалитетот на нашиот образовен систем, изјави Адеми.
Амбасадорот на Франција, Кристијан Тимоние изрази задоволство што е денеска во посета на ова училиште, во чие име е една од девизите на Франција, и дека целта на посетата на училиштата е да види како учениците се подготвуваат за изучување на на францускиот јазик.
Градоначалникот на Општина Карпош, Стефан Богоев потенцираше дека основното училиште “Братство” е симбол на соживот каде учат ученици од повеќе етнички заедници кои го изучуваат францускиот јазик но и дека ќе има обука на наставниот кадар по француски јазик, во ова и останатите училишта.
За салата што е руинирана, градоначалникот Богоев изјави дека ќе биде обновена со помош на француската Влада.
– Салата е изградена по катастрофалниот земјотрес во Скопје со помош на француската Влада, и преземаме иницијатива владата да ни го додели како сопственост на Општина Карпош, како и нејзино целосно враќање во функција”, појасни градоначалникот Богоев во врска со спортската сала.